Promocionet & telefonatat mashtruese vijojnë të jenë një shqëtësim global për operatorët e telekomunikacionit. Kohët e fundit, kanë qarkulluar disa “ads” (reklama) në adresa të ndryshme interneti, të cilat ju adresohen përdoruesve të rastësishëm të internetit apo përdoruesve të aplikacioneve të ndryshme të telefonave smart apo tabletave.

Këto “ads”, njoftojnë përdoruesin e internetit/aplikacionit se janë përzgjedhur si fitues të një aparti cellular të markës më të fundit. Me qëllim përmbylljen e procesit të “përzgjedhjes” ata kërkojnë nga “viktima”, që të plotësojë një pyetësor dhe me pas të kontaktojë nëpërmjet telefonit, me qëllim përmbylljen e procesit të përzgjedhjes dhe dhënien e informacioneve përkatëse për tërheqjen e aparatit të fituar.
Pas kontaktimit të këtyre numrave, ata përpiqen që të zgjasin sa më shumë bisedën telefonike, duke kërkuar informacione të ndryshme apo duke bërë pyetje të ndryshme, të cilën e shfaqin si pjesë e procedurës së “shorteut”.

Kjo skemë, nuk është asgjë tjetër vecse një skemë e avancuar e njohur botërisht si “Wangiri” (“një zile”). Nëpërmjet kësaj skeme, gjenerohen thirrje të humbura në përdorues të ndryshëm të telefonisë celulare, duke synuar që ata ti marrin mbrapsht. Nëse kjo ndodh, këto thirrje transferohen në numra ndërkombëtare me tarifa shumë të larta, të cilat më pas sjellin detyrime financiare të konsiderueshme për përdoruesin i cili ka kontaktuar këtë numër.
Këto raste mashtrimi të identifikuara nga Vodafone Albania dhe ABCom, raportohen dhe ndiqen në bashkëpunim me strukturat ligjzbatuese.
Duke marrë shkas se disa nga këto “ads”, janë shfaqur nën logot zyrtare të Vodafone dhe ABCom, dëshirojmë të theksojmë se promocionet e Vodafone Albania dhe ABCom realizohen vetëm nëpërmjet kanaleve tona zyrtare dhe në rast të pjesmarrjes në një promocion/konkurs, fituesi/t kontaktohen vetëm nga shërbimi i klientit duke ju komunikuar informacionet perkatëse.

Vodafone Albania dhe ABCom dëshiron t’ju kujtojë të gjithë pajtimtarëve disa nga rregullat për shmangien e mashtrimeve “Wangiri”;

• Mos ju përgjigjni telefonatave ndërkombëtare!
  Nëse keni një telefonatë të humbur nga një numër ndërkombëtar (apo ndonjë format i pazakontë), mos u tundoni t'i telefononi.

• Bllokoni telefonatat ndërkombëtare!
  Për tu siguruar që mos të bini pre e mashtrimit, ju mund t'i thoni kompanisë tuaj të telefonisë të bllokojë të gjitha telefonatat ndërkombëtare.

• Mbylleni telefonatën menjëherë!
  Nëse i jeni përgjigjur një telefonate për të cilën dyshoni se ëshë mashtruese, sigurohuni që ta ndërprisni menjëherë.

Në rast të dyshimit për nje telefonatë mashtruese, mund të telefononi pa pagesë në numrat e telefonit 140 / 149 dhe të raportoni rastin.

Vodafone Albania dhe ABCom, garantojnë të gjithë përdoruesit e rrjetit të vet se masat për bllokimin e thirrjeve mashtruese jo vetëm që azhornohen në mënyrë të rregullt por gjithashtu ato trajtohen me prioritet duke u raportuar edhe në organet ligjzbatuese.